Eu Rural comeza a elaboración da estratexia de desenvolvemento local para o 2023-2027

A Asociación de Desenvolvemento Galicia Suroeste EuRural arrancou esta semana a elaboración da Estratexia de Desenvolvemento Local para os 13 concellos do seu territorio para o 2023-2027. Tras se elixida como entidade colaboradora na medida Leader Galicia para ese período, a Xunta directiva deu o pistoletazo de saída este mércores en Tomiño ao inicio dos traballos de adquisición de capacidades e accións preparatorias para o deseño da futura estratexia, a través da que se xestionarán os novos fondos do Programa Leader previstos para o período 2023-2027.

Para a elaboración desta estratexia porase en marcha un proceso participativo que busca a implicación dos sectores económicos, sociais e culturais do territorio e que comezará a vindeira semana con catro mesas informativas abertas a todo o público en concellos das catro comarcas que aglutina EuRural. O martes 4 ás 20.00 horas as persoas interesadas poderán asistir aos encontros que se realizarán no Centro Neural de Gondomar e no Multiusos do Rosal. Mentres, o xoves 6 (20.00 h) os encontros serán no salón de actos da Axencia de Colocación de Mos e no salón de plenos de Pazos de Borbén.

A propia estratexia recollerá unha proposta de actuacións para a elaboración da análise e diagnóstico do territorio, dos resultados dos PDR anteriores, así como unha proposta para o deseño dos proxectos piloto e de accións para a promoción da participación das mulleres nos órganos de goberno e toma de decisións.

Nos últimos tres anos, Eurural desenvolveu a través do Programa Leader 16 proxectos que supuxeron un investimento total de máis de 1,8 millóns de euros, dos que arredor de 620.000 euros foron financiados a través das convocatorias 2020-2021 e 2021-2022. Estas iniciativas, centradas na dixitalización, ampliación empresarial, no lecer ou na saúde, entre outros sectores, supuxeron a creación de 16 novos postos de traballo e a consolidación doutros 38 xa existentes.

 

FONTE: Eu Rural